ئايه‌توڵڵا سيستاني، ره‌خنه له جلوبه‌رگي گه‌نجاني عێراق ده‌گرێت
ئايه‌توڵڵا عه‌لي سيستاني، مه‌رجه‌عي باڵاي شيعه‌كاني عێراق، ره‌خنه له گه‌نجان و لاواني عێراق ده‌گرێت به‌هۆي ئه‌وه‌وه كه جلوبه‌رگي ناشايسته ده‌پۆشن له‌كاتي چونيان بۆ ناو مزگه‌وته‌كان له رۆژاني زياره‌تدا.
به پێي هەواڵي تێبيان کوردي و ڕاپورتي هەواڵی ئاژانسي هه‌واڵي ئه‌سوات ئه‌لعێراق، له باره‌ي تێبينييه‌كاني له‌سه‌ر شێوازي ئه‌و جلوبه‌رگانه‌ي كه گه‌نجاني عێراق ده‌يانپۆشت له كاتي چوونيان بۆ مزگه‌وته‌كان وتوويه‌تي: "هه‌ندێك له جلوبه‌رگه‌كان حه‌رامن و هه‌ندێكيشيان گونجاو نين، له هه‌موو حاڵه‌تێكيشدا پێويسته له‌سه‌ر گه‌نجان و لاوان جلوبه‌رگي ناشايسته‌ي ته‌سك ياخود ئه‌و جلوبه‌رگانه نه‌پۆشن كه وێنه و گوزارشتي ناشايسته‌يان له‌سه‌ر نووسراوه‌و له‌گه‌ڵ بنه‌ما ئاينييه‌كاندا نه‌گونجاوه".
سيستاني راشيگه‌ياندووه، پۆشيني جلوبه‌رگ به‌شێكه له هه‌ڵسوكه‌وتي مرۆڤه‌كان، هه‌روه‌ك ئاماژه‌يه بۆ ئاستي عه‌قڵ و رۆشنبيري و ده‌روون و هۆشي تاكه‌كان. راشيگه‌ياندووه: "پێويسته به تايبه‌تي له شوێنه پيرۆزه‌كاني وه‌ك مزگه‌وت و مه‌زارگه ئاينييه‌كاندا ره‌چاوي پۆشيني جلوبه‌رگ بكرێت".
